ದಾಸರ ಪದಗಳು
( ರಾಗ ಮಧ್ಯಮಾವತಿ ಝಂಪೆ(/ಅಟ) ತಾಳ)
ರಾಜಭೋಗಕಿಂತಧಿಕ ಭೋಗವುಂಟೆ || ಪ ||
ರಾಜೀವಾಕ್ಷನಿಗಿಂತಧಿಕ ದೈವವುಂಟೆ ||ಅ ||
ಶರೀರ ಧರ್ಮ ಅರಿಯದಗೆ ಜಾಗ್ರವುಂಟೆ
ಗುರುವಿಂದಲಧಿಕ ಮುಕ್ತಿಯನೀವರುಂಟೆ
ಮರಣಕಿಂತಧಿಕ ವೆಗ್ಗಳ ಭಯವುಂಟೆ
ಸಿರಿ ತೊಲಗಿದ ಮೇಲೆ ಸುಖವೆಂಬುದುಂಟೆ ||
ಮೂಢನೆಂಬವಗೆ ಬಲ್ಲವಿಕೆ ತಾನುಂಟೆ
ಹೇಡಿಯಾದವಗೆ ದೈರ್ಯದ ಬಲವುಂಟೆ
ಪಾಡಲರಿಯದವಗೆ ಸ್ವರಭೇದವುಂಟೆ
ಗಾಡಿಗಾತಿಯರಿಗೆ ಪತಿ ಭಕ್ತಿಯುಂಟೆ ||
ನುಡಿಯಬಲ್ಲವಗೆ ಕಲಹವೆಂಬುದುಂಟೆ
ಕೊಡಬಲ್ಲವಗೆ ಲೋಭದ ತೊಡರುಂಟೆ
ಜಡ ಮುಸುಕಿದಗೆ ವಿದ್ಯೆಯ ಬಲವುಂಟೆ
ಒಡೆಯ ಪುರಂದರವಿಠಲಗೆಣೆಯುಂಟೆ ||
( ರಾಗ ಕಾಪಿ ಆದಿ ತಾಳ)
ರಂಗ ದಧಿಯ ಮಥಿಸುವಂತರಲ್ಲಿ , ಅವರು ಒ-
ದಗಿ ಹೇಳಲು ಬಂದರಿಂತಿಲ್ಲಿ ನಿನ್ನ ಸೊ-
ಬಗು ಗೋವಳರ ಕೂಡ ತಾ ಹೋದ್ಯಂತೆ
(ರಂಗ ಚತುರತನದಿ ಬೆಣ್ಣೆ ಮೆದ್ಯಂತೆ )
ನಾ ಸುಳಸಿ , ಇಂಥಾ ಮಗನು ಯಾಕಾದ್ಯೊ ||
ಅಮ್ಮ, ಕತ್ತಲೆ ಮನೆಯೊಳಗೆ ಬರಲು
ಅಲ್ಲಿ ಬೆಕ್ಕು ಮೊಸರು ಕುಡಿಯುತಿರಲು ನಾನು
ಹೊಕ್ಕು ಹೊಕ್ಕು ಹೊರಡಿಸಿ ಬಂದೆ ಮತ್ತೆ
ಬೆಣ್ಣೆ ಮೆಲ್ಲಲಿಲ್ಲ ಅಂಥಾ ಮಗನು ನಾನಲ್ಲ ||
ರಂಗ , ಅತ್ತೆ ಮನೆಯವರಂತಲಿ
ಅವರ ಹತ್ತಿಲಿ ಹೋಗಿ ನಿಂತಿದ್ದೆಂತೆ ನೀನು
ಅವರ ಚಿತ್ತವ ಪಲ್ಲಟ ಮಾಡಿ ಹೋದ್ಯಂತೆ
ನಾ ಸುಳಸಿ ಇಂಥಾ ಮಗನು ಯಾಕಾದ್ಯೋ ಕೃಷ್ಣಯ್ಯ ||
