ಸಾಧು ಸಂಗವಾಗದ ಬಾಳು

( ರಾಗ ಯದುಕುಲಕಾಂಭೋಜ ಆದಿ ತಾಳ) ಸಾಧು ಸಂಗವಾಗದ ಬಾಳು ಬಾಳು ಆಗದಯ್ಯ ||ಪ || ಸಾಧು ಸಂಗ ಎಂಬೊದಯ್ಯ ಕ್ಷೇಮ ನಮಗೆ ನೀಡುವುದಯ್ಯ ||ಅ|| ಉದಯದಲಿ ಎದ್ದು ಹರಿಯ ನಾಮವನ್ನು ಒದರಿಯೊದರಿ ಸತತವು ನಿರ್ಮಲನಾಗಿ ನಾರದವಂದ್ಯನ ಪಾಡಿ ಆಡುವಂಥ || ತನ್ನ ಮರೆತು ಘನ್ನಮಹಿಮನ ಭಿನ್ನವಿಲ್ಲದ ಭಕುತಿಯಲಿ ಚಿನ್ನಕೃಷ್ಣನ ಧ್ಯಾನದಲಿದ್ದು ಧನ್ಯನಾಗಿ ಬಾಳುವಂಥ || ಪರಮ ಪುರುಷ ಕೃಷ್ಣರಾಯ ಪರನೆಂಬ ಜ್ಞಾನದಲಿ ಎರೆದು ಏಳು ದ್ವೇಷವ ಬಿಡು ದುರುಳ ಆಸೆಯ ತರಿದಂಥ || ಆನಂದ ಆನಂದದಿಂದ ಗೆಜ್ಜೆ ಕಟ್ಟಿ ಲಜ್ಜೆ ಬಿಡು(/ಟ್ಟು) ಆನಂದಭಾಷ್ಪವಗೊಂಡು ಆನಂದನಕಂದನ ಭಜಿಸುವ || ತಂದೆ ಪುರಂದರವಿಠಲರಾಯ ಚಂದವಾಗಿ ಸಾಕುವ ನಮ್ಮನು ಮಂದ ಬುದ್ಧಿಯಿಂದ ನೀವು ಮು- ಕುಂದನ ಮರೆಯದಿರಿ ||