ಸರ್ವಾಂತರ್ಯಾಮಿ ಸಲಹೊ

--ರಾಗ ಕಾಂಬೋಧಿ (ಭೂಪ) ತಾಳ-ಝಂಪೆ ಸರ್ವಾಂತರ್ಯಾಮಿ ಸಲಹೊ ಎನ್ನ ||ಪ|| ದುರ್ವಾರ್ತೆ ಕೇಳಿ ಮನ ಬಿಡದೆ ಚಿಂತಿಸುತಿದೆ||ಅ.ಪ|| ಜೀವರಿಗೆ ಗುಣಕಾಲಕರ್ಮಪ್ರಕೃತಿಗಳ ಸ್ವ- ಭಾವಗಳನನುಸರಿಸಿ ಸುಖ-ದುಃಖವ ಈವ ದೊರೆ ನೀನಲ್ಲದಿನ್ನುಂಟೆ ಜಗಕೆ ಮ- ತ್ತಾವನೈ ಭಕ್ತರನು ಪಾಲಿಸುವ ದಾತ ||೧|| ಸತ್ಯಸಂಕಲ್ಪ ನೀನೆಂಬುದೆಂದಿಗು ಸತ್ಯ ಭೃತ್ಯವತ್ಸಲನೆಂಬೊ ಬಿರುದಿಲ್ಲವೆ ದತ್ತಾತ್ರೇಯ ನಿನ್ನ ಸ್ಮರಣೆ ಮಾತ್ರದಿ ಅಪ- ಮೃತ್ಯು ಪರಿಹರವಹುದು ಸಂದೇಹವಿಲ್ಲಿದಕೆ ||೨|| ಶ್ರೀಪತೇ ಎನ್ನ ವಿಜ್ಞಾಪನೆಯ ಕೈಕೊಂಡು ಪಾಪಿ ಜನರಿಂದ ಬಂದಾಪತ್ತನು ನೀ ಪರಿಹರಿಸಯ್ಯ ದ್ರೌಪದೀವರದ ಕರು- ಣಾಪಯೋನಿಧಿ ಜಗನ್ನಾಥವಿಠ್ಠಲಸ್ವಾಮಿ ||೩||