Skip to main content

ರಕ್ಷಿಸೊ ಶ್ರೀಶ ಶ್ರೀನಿವಾಸ

( ರಾಗ- ಮಧ್ಯಮಾವತಿ(ಸಾರಂಗ) ಅಟತಾಳ(ದೀಪಚಂದಿ) )

ರಕ್ಷಿಸೊ ಶ್ರೀಶ ಶ್ರೀನಿವಾಸ ||ಪ||
ರಕ್ಷಿಸೆನ್ನ ಪದ್ಮಾಕ್ಷ ತ್ರಿಜಗಾ-
ಧ್ಯಕ್ಷ ಖಳಜನಶಿಕ್ಷ ಪಾಂಡವ-
ಪಕ್ಷ ಕರುಣಕಟಾಕ್ಷದಲಿ ನೀ-
ನಿಕ್ಷಿಸುತ ಪೊರೆ ಪಕ್ಷಿವಾಹನ||ಅ.ಪ||

ಕೊಂಚ ಮತಿಯಲಿ ಕುಜನರ ಸೇರಿ
ಸಂಚರಿಸುತಲಿ ದೀನನಾದೆ
ಪಂಚಶರ ಸ್ಮರ ವಂಚಿಸುತ ಬಿಡೆ
ಚಂಚಲಾಕ್ಷೇರ ಪಂಚು ನೋಟದ
ಮಿಂಚಿಗೆನ್ನ ಮನ ಚಂಚಲವು ಪುಟ್ಟಿ
ವಂಚಿಸೇ ಯಮನಂಚಿಗೆ ತಲುಪಿದೆ ||೧||

ಕಿಟ್ಟಗಟ್ಟಿದ ಕಬ್ಬಿಣದಂತೆ
ಕೆಟ್ಟ ಕಿಲ್ಬಿಷದ ಕೂಪದಿ ಬಿದ್ದು
ಧಿಟ್ಟ ನಿನ್ನಯ ಗುಟ್ಟು ತಿಳಿಯದೆ
ಹೊಟ್ಟೆಗೋಸುಗ ಕೆಟ್ಟೆ, ಕುಜನರ
ಥಟ್ಟನೆ ಕಾಲಗಟ್ಟಿ ಬಹು ಶ್ರಮ-
ಪಟ್ಟು ನಾ ಕಂಗೆಟ್ಟೆ ಪ್ರತಿದಿನ || ೨||

ಶ್ರೀ ಕಮಲೇಶ ಹೃತ್ಪದ್ಮದಿ-
ನೇಶಪ್ರಕಾಶ ಬೇಗನೆ ಬಂದು
ಯಾಕೆ ತಡವೆನ್ನ ವಾಕ್ಕು ಲಾಲಿಸಿ
ಜೋಕೆಯಿಂದಲಿ ನೀ ಕರವ ಪಿಡಿ-
ದಾ ಕುಚೇಲನ ಸಾಕಿದ ಪರಿ
ಶ್ರೀಕರ ಜಗನ್ನಾಥವಿಠಲ ||೩||

ದಾಸ ಸಾಹಿತ್ಯ ಪ್ರಕಾರ: 
ಬರೆದವರು: