ಮೂರ್ಖರಾದರು ಜನರು

(ರಾಗ ಮುಖಾರಿ. ಝಂಪೆ ತಾಳ ) ಮೂರ್ಖರಾದರು ಜನರು ಲೋಕದೊಳಗೆ ||ಪ|| ಏಕ ದೇವನ ಬಿಟ್ಟು ಕಾಕು ದೈವವ ಭಜಿಸಿ ||ಅ.ಪ|| ಒಂಟಿಯಲಿ ಹೆಂಡತಿಯ ಬಿಡುವಾತನೇ ಮೂರ್ಖ ಗಂಟನೊಬ್ಬರ ಕೈಯಲಿಡುವಾತ ಮೂರ್ಖ ನೆಂಟರಿಗೆ ಸಾಲವನು ಕೊಡುವಾತ ಮೂರ್ಖ, ಜನ- ಕಂಟಕನಾಗಿರುವ ಕಡು ಮೂರ್ಖನಯ್ಯ || ಪಡೆದ ಮಕ್ಕಳ ಮಾರಿ ಒಡಲ ಪೊರೆವವ ಮೂರ್ಖ ಮಡದಿ ಹುಟ್ಟಿದ ಮನೆಯಲಿರುವವನು ಮೂರ್ಖ ಬಡತನವು ಬಂಡಾಗ ಬೈದುಕೊಂಬುವ ಮೂರ್ಖ ದೃಢ ಭಕ್ತಿಯಿಲ್ಲದವ ಕಡು ಮೂರ್ಖನಯ್ಯ || ಮುಪ್ಪಿನಲಿ ಮದುವೆಯನು ಮಾಡಿಕೊಂಬುವ ಮೂರ್ಖ ಸರ್ಪನಲಿ ಸರಸವಾಡುವನೆ ಮೂರ್ಖ ಇಪ್ಪತ್ತ ಒಂದು ಕುಲ ಉದ್ಧರಿಸದವ ಮೂರ್ಖ ಅಪ್ಪ ರಂಗಯ್ಯನ ಭಜಿಸದವ ಮೂರ್ಖ|| ರಾಮ ನಾಮವ ಭಜಿಸಿ ನೆನೆಯದವ ಮೂರ್ಖ ಹೇಮವನು ಗಳಿಸಿ ಉಣದವನು ಮೂರ್ಖ ಕಾಮದಲಿ ಹಿರಿಯಳ ಕೂಡಿಕೊಂಡವ ಮೂರ್ಖ ಭೂಮಿದಾನವ ತೆಗೆದ ಭೂಪತಿಯು ಮೂರ್ಖ|| ಕಾಶಿಯಲಿ ದೇಹವನು ತೊಳೆಯದಿದ್ದವ ಮೂರ್ಖ ಭೂಸುರರಿಗನ್ನವನು ಕೊಡದವನು ಮೂರ್ಖ ಶೇಷಗಿರಿ ಕೃಷ್ಣನ ಭಜಿಸದಿದ್ದವ ಮೂರ್ಖ ದಾಸನಾಗದ ಮನುಜ ಕಡು ಮೂರ್ಖನಯ್ಯ|| ಸತ್ತ ಕರುವಿನ ತಾಯ ಹಾಲ ಕರೆವವ ಮೂರ್ಖ ಒತ್ತೆಯಿಲ್ಲದೆ ಸಾಲ ಕೊಡುವವನು ಮೂರ್ಖ ಹತ್ತೆಂತು ಬಗೆಯಲ್ಲಿ ಹಂಬಲಿಸುವವ ಮೂರ್ಖ ಹೆತ್ತ ತಾಯಿಯ ಬೈವ ಕಡು ಮೂರ್ಖನಯ್ಯ|| ಸ್ವಾಮಿ ನಾಮವ ಬಿಡದೆ ಭಜಿಸದಿದ್ದವ ಮೂರ್ಖ ಸ್ವಾಮಿ ಗುರುಹಿರಿಯರಿಗೆ ಎರಗದವ ಮೂರ್ಖ ನೇಮದಲಿ ಹರಿಯ ಕಥೆಯ ಕೇಳದವ ತಾ ಮೂರ್ಖ ತಾಮಸರ ಕೂಡಿ ಕೊಂಬವನೆ ಕಡು ಮೂರ್ಖ|| ಉಂಡ ಮನೆಗೆರಡನ್ನು ಬಗೆಯುವಾತನೆ ಮೂರ್ಖ ಕೊಂಡೆ ಮಾತನು ಕೇಳಿ ಕುಣಿವವನು ಮೂರ್ಖ ಪುಂಡರೀಕಾಕ್ಷ ಶ್ರೀ ಪುರಂದರ ವಿಠಲನ ಕೊಂಡಾಡಿ ಭಜಿಸದವ ಕಡು ಮೂರ್ಖನಯ್ಯ||