ಜಂಗಮರು ನಾವು ಜಗದೊಳು

( ರಾಗ ನಾದನಾಮಕ್ರಿಯೆ ಏಕತಾಳ) ಜಂಗಮರು ನಾವು ಜಗದೊಳು ||ಪ|| ಜಂಗಮರು ನಾವು ಲಿಂಗಾಂಗಿಗಳು ಮಂಗಳವಂತರು ಭವಿಗಳೆಂತೆಂಬಿರಿ ||ಅ|| ಹರಗುರು ದೈವ ಕೇಶವ ನಮ್ಮ ಮನೆದೈವ ವರದ ಮೋಹನ ಗುರುಶಾಂತೇಶ ಹರಗುರು ದ್ರೋಹ ಮಾಡಿದ ಪರವಾದಿಯು ರೌರವ ನರಕದಿ ಮುಳುಗುವುದೆ ಸಿದ್ಧ || ವಿಭೂತಿ ನಮಗುಂಟು ವಿಶ್ವೇಶ ನಮಗುಂಟು ಶೋಭನ ನಾಮ ಮುದ್ರೆಗಳುಂಟು ಶ್ರೀ ಭಾಗೀರತಿಯಗಣಿತ ಮಜ್ಜನವುಂಟು ಸೌಭಾಗ್ಯವೀವ ಮಹಂತನ ಮಠದವರು || ವಿರಕ್ತರು ನಾವು ಶೀಲವಂತರು ನಾವು ವೀರಭದ್ರಪ್ರಿಯ ಭಕ್ತರು ನಾವು ಕಾರಣಕರ್ತ ಪುರಂದರವಿಠಲನ ಕಾರುಣ್ಯಕೆ ಮುಖ್ಯಪಾತ್ರರು ನಾವು||