ಗೋವಿಂದಾ ನಮೋ

ಗೋವಿಂದಾ ನಮೋ

( ರಾಗ ಆನಂದಭೈರವಿ. ತ್ರಿಪುಟ ತಾಳ) ಗೋವಿಂದಾ ನಮೋ ಗೋವಿಂದಾ ನಮೋ ಗೋವಿಂದಾ ನಾರಾಯಣ ಗೋವರ್ಧನ ಗಿರಿಯನೆತ್ತಿದ ಗೋವಿಂದಾ ನಮ್ಮ ರಕ್ಷಿಸೈ || ಮಂಚ ಬಾರದು ಮಡದಿ ಬಾರಳು ಕಂಚು ಕನ್ನಡಿ ಬಾರದು ಸಂಚಿತಾರ್ಥದ ದ್ರವ್ಯ ಬಾರದು ಮುಂಚೆ ಮಾಡಿದ ಧರ್ಮವೆ || ಅರ್ಥವ್ಯಾರಿಗೆ ಪುತ್ರರ್ಯಾರಿಗೆ ಮಿತ್ರ ಬಾಂಧವರ್ಯಾರಿಗೆ ಕರ್ತು ಯಮನವರೆಳೆದು ಒಯ್ವಾಗ ಅರ್ಥ ಪುತ್ರರು ಕಾಯ್ವರೆ || ತಂದು ಬಂದರೆ ತನ್ನ ಪುರುಷನ ಹಸಿದು ಬಳಲಿದಿರೆಂಬಳು ಒಂದು ದಿವಸವು ತಾರದಿದ್ದರೆ ಹಂದಿ ನಾಯಂತೆ ಕೆಲೆವಳು || ಪ್ರಾಣವಲ್ಲಭೆ ತನ್ನ ಪುರುಷನ ಕಾಣದೆ ನಿಲ್ಲಲಾರಳು ಪ್ರಾಣ ಹೋಗಲು ಮುಟ್ಟಲಂಜುವಳು ಜಾಣೆ ಕರೆದರು ಬಾರಳು || ಉಂಟುಕಾಲಕೆ ನೆಂಟರಿಷ್ಟರು ಬಂಟರಾಗಿ ಕಾಯ್ವರು ಕಂಟಕೆಮನೋರು ಬಂದು ಎಳೆವಾಗ ನೆಂಟರಿಷ್ಟರು ಬಾರರು || ಒಡೆವೆ ಅರಸಿಗೆ ಒಡಲು ಅಗ್ನಿಗೆ ಮಡದಿ ಮತ್ತೊಬ್ಬ ಚೆಲುವಗೆ ಬಡೆದೆಳೆದು ಯಮನವರು ಒಯ್ವಾಗ ಎಡವಿ ಬಿದ್ದಿತು ನಾಲಿಗೆ || ದಿಟ್ಟತನದಿ ಪಟ್ಟನಾಳಿದ ವೃಷ್ಟಿ( ವೃಷ್ಣಿ? ) ನಂದನ ಚರಣವ ಮುಟ್ಟಿ ಭಜಿಸಿರೊ ಸಿರಿಪುರಂದರ ವಿಟ್ಠಲೇಶನ ಪಾದವ ||
ದಾಸ ಸಾಹಿತ್ಯ ಪ್ರಕಾರ
ಬರೆದವರು