Skip to main content

ಗರುವ ಗಂಭೀರ ನಾಯಕಾ

( ರಾಗ ಯದುಕುಲಕಾಂಭೋಜಿ(ಯರಕಲಕಾಂಭೋಜ?) . ಝಂಪೆ ತಾಳ)

ಗರುವ ಗಂಭೀರ ನಾಯಕಾ ಹರಿಯೆ ||ಪ ||

ಹರಿಯೆ ಹಳಚಿಕೆವುಳ್ಳನಲ್ಲವೆ
ಸುರೂಪಿ ಸಮಗುಣನು ನೀನಲ್ಲವೆ
ಸಿರಿವಂತ ಸರ್ವಾಕಳಂಕ ನೀನಲ್ಲವೆ
ಕರೆಸಿಕೊಳ್ಳೆಯೇಕೆನ್ನನು ಹರಿಯೆ ||

ವೇಳೆಯಲ್ಲವೆ ಅನು ಬಂದುದು
ಕೇಳುತಿಲ್ಲವೆ ಕಂಜನೇತ್ರ
ಸೋಳ ಸಾಸಿರದ ಗೋಪಿಯರೊಳಗಣ
ಸೂಳುಪಾಳಿನಿಂ ತೆರಹಿಲ್ಲವೆ ||

ಕುಬುಜೆಯ ಕೂಟ ಬೇಟದೊಳಿದ್ದೆಯೊ
ಅಂಬುಜೆಯಾಲಿಂಗನದೊಳಿದ್ದೆಯೊ
ಅಂಬುಜನಾಭ ಪೇಳೆನ್ನಾಣೆ ನಿನ್ನ
ಚುಬುಕ ಪಿಡಿದು ಮುದ್ದಾಡುವೆನೊ ||

ಏನೆನ್ನಬಾರದ ಎತ್ತೆನ್ನಬಾರದ
ಸ್ವಾನುಭಾವಿ ನೀನೆಂತೆಂಬೆಯೊ
ಆನೆ ಮರುಳಾಗಿ ಬಂದೇನಲ್ಲದೆ
ನೀನೇ ಕೊಡೆ ಪಂಥ ಪ್ರಾಣೇಶನೆ ||

ಈಗ ತಾನಾದರೆ ಮನಸಾಯಿತೆ ನಿನ್ನ
ಶ್ರೀಗೆ ಸಿಲುಕಿದ ಸಿರಿವಲ್ಲಭ
ನಾಗಮಂಗಲದ ಚೆನ್ನ ಶ್ರೀಕೇಶವರಾಯ
ಭೋಗಿ ಪುರಂದರವಿಠಲರಾಯನೆ ನಮೋ ||

ದಾಸ ಸಾಹಿತ್ಯ ಪ್ರಕಾರ: 
ಬರೆದವರು: