Skip to main content

ಗಜುಗನಾಡುತಲಿರ್ದನು

( ರಾಗ ಕೇದಾರಗೌಳ. ಛಾಪು ತಾಳ)

ಗಜುಗನಾಡುತಲಿರ್ದನು ನಮ್ಮ ರಂಗ ||ಪ||
ವ್ರಜದ ಮಕ್ಕಳ ಕೂಡ ಹರುಷದಿಂದಲಿ ಬಲು ||ಅ ||

ಒಂದನ್ನೆ ಹಾರಿಸಿದ ವೇಗದಿ ಮ-
ತ್ತೊಂದರಿಂದಲಿ ತಾ ಬಡೆದ
ಒಂದೆ ಬಾರಿಗೆ ಎಲ್ಲ ಗಜುಗವ ಗೆಲಿದನು ||

ಬಚ್ಚಿಟ್ಟ ಗಜ್ಜುಗವ ಹುಡುಕೆಂದು
ಅಚ್ಯುತ ನಗುತ ನಿಂತ
ಮುಚ್ಚಿಟ್ಟ ಗಜುಗವು ದೊರಕಲಿಲ್ಲವೊ ಒಂದು ||

ಕಾಕಾಚಿ ಕೊಂಡ್ಹೋಯಿತು ಎನುತಲಿ ರಂಗ
ಆಕಾಶವನು ತೋರಿದ
ಬೇಕಾದ ಗಜುಗವ ನಿಮಗೆ ತರುವೆ ಎಂದ ||

ಗಜುಗ ಗಿಡಗಳನೇಕ ತೋರಿದವಯ್ಯ
ಗಜುಗ ಗೊಂಚಲುಗಳನೇಕ
ಗಜುಗದ ಗಂಟುಗಳ ಕಟ್ಟಿದರು ಮಕ್ಕಳು ||

ಪರಿ ಪರಿ ಗಜುಗದಾಟ ಮಕ್ಕಳ ಸಂಗಡ
ಗೆರೆಯ ದಾಟುವ ಆಟವು
ನೆರೆಹೊರೆ ಮಕ್ಕಳ ಕೂಡ ಸಂಭ್ರಮ ಮಾತು ||

ಬೊಮ್ಮನ ಪಡೆದಂಥ ಚಿಕ್ಕ ಕೂಸು
ಅಮ್ಮನ ತೊಡೆಯ ಮೇಲೆ
ಗಮ್ಮನೆ ಮಲಗಿದ ಆಟಂಗಳನೆ ಬಿಟ್ಟು ||

ಸುರರು ವಂದಿಸಿ ನಿಲ್ಲಲು ಯಕ್ಷ ಕಿನ್ನರರು
ಸ್ವರವೆತ್ತಿ ಸ್ತುತಿಗೈಯಲು
ದೊರೆ ತಂದೆ ಪುರಂದರವಿಠಲನು ಒಪ್ಪಿದ ||

ದಾಸ ಸಾಹಿತ್ಯ ಪ್ರಕಾರ: 
ಬರೆದವರು: