ಏನೇನು ದಾನವ ಮಾಡಲಿ

(ರಾಗ ಪಂತುವರಾಳಿ. ಛಾಪು ತಾಳ.) ಏನೇನು ದಾನವ ಮಾಡಲಿ ಹರಿ- ಧ್ಯಾನಕ್ಕೆ ಸಮವಾದ ದಾನಗಳುಂಟೆ ಶತಕೋಟಿ ಕನ್ಯಾಪ್ರದಾನವ ಮಾಡಲಿ ಅತಿಶಯ ಉದಕ ದಾನವ ಮಾಡಲಿ ಮತಿ ಶುದ್ಧವಾಗಿ ಭೂದಾನವ ಮಾಡಲಿ ಕೃತಿ ರಮಣನ ಧ್ಯಾನಕೆ ಸರಿಯುಂಟೆ ದಿನಕೊಂದು ಸಾವಿರ ಗೋದಾನ ಮಾಡಲಿ ಅನುದಿನ ಅನ್ನದಾನವ ಮಾಡಲಿ ಘನವಾಗಿ ಸುವರ್ಣ ದಾನವ ಮಾಡಲಿ ವನಜನಾಭನ ಧ್ಯಾನಕೆ ಸರಿಯುಂಟೆ ಸಾದರದಿ ತರ್ಕ ವ್ಯಾಕರಣ ಪೇಳಲಿ ವೇದ ಗೀತ ಭಾಷ್ಯವನೋದಲಿ ಸಾಧಿಸಿ ಸ್ನಾನ ಜಪಂಗಳ ಮಾಡಲಿ ಮಾಧವನ ಧ್ಯಾನಕ್ಕೆ ಸರಿಯುಂಟೆ ಉತ್ತಮವಾದ ವಸ್ತ್ರ ದಾನವ ಮಾಡಲಿ ಮುತ್ತು ಮಾಣಿಕ್ಯ ದಾನವ ಮಾಡಲಿ ಅತ್ಯಂತ ವಿದ್ಯಾ ಪ್ರದಾನವ ಮಾಡಲಿ ಚಿತ್ತಜ ಪಿತನ ಧ್ಯಾನಕೆ ಸರಿಯುಂಟೆ ನಾನಾ ತೀರ್ಥಗಳಲ್ಲಿ ಸ್ನಾನವ ಮಾಡಲಿ ಕಾನನದೊಳಗೆ ತಪವ ಮಾಡಲಿ ಜ್ಞಾನದಿಂದ ಶಾಸ್ತ್ರಾರ್ಥ ಮಾಡಲಿ ನಿನ್ನ ಧ್ಯಾನಕೆ ಸರಿಯುಂಟೆ ಪುರಂದರ ವಿಠಲ