ಇನ್ನು ಪುಟ್ಟಿಸದಿರಯ್ಯ

(ರಾಗ ರೇಗುಪ್ತಿ ಝಂಪೆತಾಳ) ಇನ್ನು ಪುಟ್ಟಿಸದಿರಯ್ಯ, ಪುಟ್ಟಿಸಿದಕೆ ಪಾಲಿಸಯ್ಯ ನನ್ನ ದಯದಿ ತಾರಿಸಯ್ಯ ||ಪ|| ನಿನ್ನ ಪಾದಾಂಭುಜವ ನಂಬಿದೆನು ರಘುಪತಿಯೆ ಬೆನ್ನುಬಿದ್ದೆನು ಭವಬಂಧನ ಬಿಡಿಸೊ ||ಅ|| ಅಮರೇಂದ್ರವಂದಿತನೆ ಅನಂತಮಹಿಮನೆ ಕಮಲಸಖತೇಜಕರನೆ ಅಮಿತಲೋಹಿತನೆ ನೀ ಕಾಮಿತವರದನೆ ವಿಮಲ ವಿಭೀಷಣಗೊಲಿದ ದಯದಿಂದಲೆನ್ನ || ಅಜಮಿಳ ಅಂಬರೀಷ ಅಕ್ರೂರ ನಾರದಗೆ ಗಜರಾಜ ಗಿರಿಜೇಶಗೆ ಅಜಧ್ರುವ ಅರ್ಜುನಗೆ ನಿಜಭಕ್ರ ಪ್ರಹ್ಲಾದಗೆ ದ್ವಿಜಗೆ ರುಕ್ಮಾಂಗದಗೆ ಒಲಿದ ದಯದಿಂದಲೆನ್ನ || ಎಂದೆಂದಿಗೆ ನಿನ್ನ ಪಾದವೆನಗೆ ನೆಲೆಯಾಯಿತು ಅಂದು ನಿನ್ನ ಪಾದಭಜನೆ ಎಂದಿಗೆ ನಿನ್ನ ಪಾದ ಪಿಡಿಸಿ ಸಲಹೋ ಸ್ವಾಮಿ ಅಂದು ಅಂಜನೆಕಂದಗೊಲಿದ ದಯದಿಂದಲೆನ್ನ || ಅವರಂತೆ ನಾನಲ್ಲ ಅವರ ದಾಸರ ದಾಸ ಸವರಿ ಬಿಸುಟೆನ್ನ ದೋಷ ಪಾವನ್ನ ಮಾಡಯ್ಯ ಪುಂಡರೀಕವರದನೆ ಅವಸರಕೆ ದ್ರೌಪದಿಗೆ ಒಲಿದ ದಯದಿಂದಲೆನ್ನ || ಅಂತರಂಗದುಬ್ಬಸವ ನಿನಗೆ ಉಸಿರುವೆ ನಾನು ಸಂತಸದಿ ಗೌತಮನ ಸತಿ ಸಲಹಿದೆ ಸಂತತ ನಿನ್ನ ಭಕ್ತರನು ಪಾಲಿಸುವ ಕಂತುಪಿತ ನಮ್ಮ ಸಿರಿಪುರಂದರ ವಿಠಲ ||