ನೀನ್ಯಾರು ಪೇಳೆನ್ನ ಕಣ್ಣಮುಚ್ಚಿದೆ

(ರಾಗ ಕಾಂಭೋಜ. ಆದಿ ತಾಳ ) ನೀನ್ಯಾರು ಪೇಳೆನ್ನ ಕಣ್ಣಮುಚ್ಚಿದೆ ಮೌನಗೊಂಡರಿಯದಂತಿಹೆ ನಗುತಿ ||ಪ|| ಯಶೋದೆಯಲ್ಲಾಡುತಲ್ಲಾಡುತ ಶಶಿಮುಖಿ ಬಂದು ಸೆರಗ ಪಿಡಿದು ನಿಂದು ಪಶುವ ಕರೆಯೆ ಕಣ್ಣ ಮುಚ್ಚುತೊಂದು ಮಾತ ಬೆಸಗೊಂಡಳೆ ಗೋಪಿ ನಗುತಲಿಂದು || ಗೊಲ್ಲರಿಗೆಲ್ಲ ನೀ ಬಲ್ಲಿದನೊ ಎಲ್ಲ ಜೀವರ ಪ್ರಾಣದೊಲ್ಲಭನೊ ಬಲ್ಲೆ ನಿನ್ನಯ ಪರಿಯೆಲ್ಲವನು, ನೀ- ನೆಲ್ಲಿಂದ ಬಂದೆನ್ನ ಕಣ್ಣ ಮುಚ್ಚಿದೆ || ಆಪತ್ತಿಗೆ ನೆನೆಯೆ ಗೋಚರನೊ ಪಾಪಸಂಹಾರ ಪುರುಷೋತ್ತಮನೊ ಕೋಪದಿಂದಸುರರ ಕೊಂದವನೊ, ಸಾಂ- ದೀಪನ ತನಯನ ತಂದಾತನೊ || ವರಗೋಕುಲದಿ ಉನ್ನತ ಸಿರಿಯೊ, ನೀ ಬಿರುದಿನ ಸಂಚಾರದ ಕರಿಯೊ ಪರಿವೇಷದಿಂದಿಪ್ಪ ದೊರೆಯೊ, ನೀ ಮುರದೈತ್ಯನ ಮಡುಹಿದ ಹರಿಯೊ || ಅತಿ ಚೆಲುವಿಕೆ ರತಿಪತಿ ಪಿತನೊ ನೀ ಶ್ರುತಿ ಸ್ಮೃತಿತತಿಗಳ ಸಮ್ಮತನೊ ಚತುರ್ದಶಭುವನವಾಳುವ ದಾತನೊ, ಉ- ನ್ನತ ಭಕುತಜನರಿಗ್ಹಿತನೊ || ಮಂಗಳ ಶೋಭನ ಶುಭತತಿಯೊ, ಗೋ- ಪಾಂಗನೆಯರ ಮಾನ ಪ್ರಾಣಪತಿಯೊ, ವಿ- ಹಂಗಮನೇರಿ ಮೆರೆವ ಮೂರ್ತಿಯೊ, ಹೇ ಶೃಂಗಾರ ಸೊಬಗಿನ ಶ್ರೀಪತಿಯೊ || ಬೆಸಗೊಂಡಳು ಗೋಪಿ ಕುಶಲದಿ ತಾ ಯಶೋದೆಗೆ ಶಿಶುರೂಪವಾಗಿ ತೋರುತ ಅಸುರಾರಿ ಕಂಡು ಗೋಪಿ ನಸುನಗುತ, ಇಂದು ಶಿಶುವ ಪುರಂದರವಿಠಲನೆನುತ ||