ಇದೇ ನೋಡಿರೋ ಸಂಧ್ಯಾನ , ಸದಾ ಆತ್ಮಾನುಸಂಧಾನ

(ಹಂಸಧ್ವನಿ ರಾಗ ಏಕತಾಳ) ಇದೇ ನೋಡಿರೋ ಸಂಧ್ಯಾನ ಸದಾ ಆತ್ಮಾನುಸಂಧಾನ ||ಧ್ರುವ|| ತಿಳಿಯದೆನಗೆ ತ್ರಿಕಾಲ ಹೊಳವುತಿಹುದು ಸೂರ್ಯ ಅಚಲಾ ಕಾಳವ್ಯಾಳ್ಯಲ್ಲಿದಕ ಸಮೂಲಾ ಇಳೆಯೊಳಾಯಿತು ಧರ್ಮಾನುಕೂಲಾ ||೧|| ಚಂಚಲೆಂಬುದೆ ಆಚಮನ ಮುಂಚೆ ಸಂಧ್ಯಾನಕಿದೆ ಸಾಧನ ಸಂಚಿತ ಪ್ರಾಲಬ್ಧಕ್ರಿಯಮಾಣಾ ವಂಚನಿಲ್ಲದ್ದಾಯಿತು ಅರ್ಘ್ಯದಾನ ||೨|| ಪರಮೇಷ್ಠಿ ಪರಬ್ರಹ್ಮಋಷಿಃ ಅರಿತು ಪ್ರಣಮ್ಯ ಸಾಧಿಸಿ ತಿರುಗಿ ನೋಡಿ ಘನ ಸ್ಮರಿಸಿ ಕರಗಿ ಹೋಯಿತು ಪಾಪದ ರಾಶಿ ||೩|| ಆ ಜಪವೆ ಗಾಯತ್ರಿ ಮಂತ್ರ ಬೀಜಾಕ್ಷರವಿದು ಪವಿತ್ರ ರಾಜಿಸುತಿಹುದು ಸರ್ವಾಂತರಾ ನಿಜಗುಹ್ಯ ಋಷಿಮುನಿ ಗೋತ್ರ ||೪|| ಸದೋದಿತ ಗುರುಬೋಧ ಪೂರ್ಣ ಇದಕಿಲ್ಲ ಉದಯಾಸ್ತಮಾನ ಇದೇ ಮಹಿಪತಿ ಸಂಧ್ಯಾನ ಸದಾ ನಿತ್ಯಾನುಸಂಧಾನ ||೫||