ಏಕೆ ಚಿಂತಿಸುತಿದ್ದಿ ಕೋತಿ ಮನವೆ

( ರಾಗ ಭೈರವಿ. ಝಂಪೆ ತಾಳ) ಏಕೆ ಚಿಂತಿಸುತಿದ್ದಿ ಕೋತಿ ಮನವೆ ||ಪ|| ಲೋಕನಾಥನ ನೆನೆದು ಸುಖಿಯಾಗು ಮನವೆ ||ಅ|| ಹುಟ್ಟುವಾಗಾಪತ್ತಿಗಾರು ಚಿಂತಿಸಿದವರು ಕಟ್ಟಕಡೆಯಲಿ ಲಯಕೆ ಯಾರ ಚಿಂತೆ ನಟ್ಟನಡುವಿನ ಬಾಳಿಗೇಕೆ ಚಿಂತಿಸುತಿರುವೆ ಹುಟ್ಟಿದವರಿಗೆ ಮೂರು ಬಟ್ಟಿಲ್ಲವೆ ಮರುಳೆ || ನವಿಲಿಂಗೆ ಚಿತ್ರಪತ್ರವನಾರು ಬರೆದವರು ಪವಳದಾ ಲತೆಗೆ ಕೆಂಪಿಟ್ಟವರು ಯಾರು ಸವಿಮಾತಿನರಗಿಣಿಗೆ ಹಸಿರು ಬಳಿದವರಾರು ಅವ ಮಾಡಿದವ ನಮ್ಮ ಮರೆತಿಹನೆ ಮರುಳೆ || ಬಸಿರೊಳಗೆ ಶಿಶುವನು ಅದಾರು ಸಲಹಿದವರು ವಸುಧೆಯನು ಬಸಿರೊಳಿಟ್ಟಿರುವರಾರು ಹಸಗೆಡದೆ ನಮ್ಮ ಶ್ರೀ ಪುರಂದರ ವಿಟ್ಠಲನ ಬಿಸಜ ಪಾದವ ನಂಬಿ ಸುಖಿಯಾಗು ಮರುಳೆ ||