ಈ ಗ್ರಾಮದಲಿ ವಾಸ

(ರಾಗ ಮುಖಾರಿ ಅಟತಾಳ) ಈ ಗ್ರಾಮದಲಿ ವಾಸ ಇರುವುದೆ ಪ್ರಯಾಸ ||ಪ|| ಹೊನ್ನು ಹಣಗಳು ಇಲ್ಲ ಇರುವುದಕೆ ಸ್ಥಳವಿಲ್ಲ ತನ್ನವರು ತನಗೆ ಎಂಬವರು ಇಲ್ಲ ಬೆನ್ನು ತೊಕ್ಕಂಬದಕೆ ಮತ್ತೆ ಸೋದರರಿಲ್ಲ ಇನ್ನಿಲ್ಲಿ ಇಹವಿಲ್ಲ ಪರವಿಲ್ಲವಲ್ಲ || ದುಡುಕಿ ಕೆಡಕನಿಗೂರು ಒಡವೆವುಳ್ಳವಗೂರು ಒಡಲಾಸೆಗೆ ತಿರುಗಿ ತಿಂಬುವಗೆ ಊರು ಬಿಡದೆ ಪರವಸ್ತುಗಳ ಅಪಹರಿಸುವಗೂರು ಕಡುಪಾಪಿ ಕಪಟಿಯಾದವರಿಗೂರು || ಎನ್ನ ಮನದುಬ್ಬಸವ ಆರಿಗುಸಿರೆಲೊ ದೇವ ಚೆನ್ನಕೇಶವ ನಿನ್ನ ಚರಣವನ್ನು ಇನ್ನು ನಂಬಿದೆನಯ್ಯ ಪುರಂದರವಿಠಲ ಬಿನ್ನಪವ ನೀ ಕೇಳಿ ಎನ್ನಸಲಹಯ್ಯ ||