ವೃಂದಾವನದೊಳು ಆಡುವನಾರೇ

( ರಾಗ ಶ್ರೀ / ಮಾಂಡ್ ಆದಿತಾಳ)

ವೃಂದಾವನದೊಳು ಆಡುವನಾರೇ ಗೋಪಿ

ಚಂದಿರವದನೆ ನೋಡುವ ಬಾರೆ ||ಪ||

ಅರುಣಪಲ್ಲವ ಪಾದಯುಗಳನೆ, ದಿವ್ಯ

ಮರಕತ ಮಂಜುಳಾಭರಣನೆ

ಸಿರಿವರ ಯದುಕುಲಸೋಮನೆ, ಇಂಥ

ಪರಿಪೂರ್ಣ ಕಾಮನಿಸ್ಸೀಮನೆ ||

ಹಾರಹೀರಗುಣಧಾರನೆ, ದಿವ್ಯ

ಸಾರಶರೀರ ಶೃಂಗಾರನೆ

ಆರಿಗಾದರು ಮನದೂರನೆ, ತನ್ನ

ಸೇರಿದವರ ಮಾತ ಮೀರನೆ ||

ಮಕರಕುಂಡಲ ಕಾಂತಿಭರಿತನೆ, ದಿವ್ಯ

ಅಕಳಂಕರೂಪಲಾವಣ್ಯನೆ

ಸಕಲರೊಳಗೆ ದೇವನೀತನೆ, ನಮ್ಮ

ಮುಕುತೀಶ ಪುರಂದರವಿಠಲನೆ ||