ಮರುಳಾಟವೇಕೋ ಮನುಜ

(ರಾಗ ಯದುಕುಲಕಾಂಭೋಜಿ. ಆದಿ ತಾಳ) ಮರುಳಾಟವೇಕೋ ಮನುಜ ಕೂಗಾಟವೇಕೋ ಸರುವ ದುರ್ಗುಣಂಗಳನ್ನು ಶರೀರದಿ ಬಚ್ಚಿಟ್ಟುಕೊಂಡು ||ಪ|| ಮೃತ್ತಿಕೆ ಶೌಚ ಮಾಡದವಗೆ ಮತ್ತೆ ಸ್ನಾನ ಮಂತ್ರವೇಕೆ ಹೊತ್ತು ಕಟ್ಟಾದವಗೆ ಅಗ್ನಿಹೋತ್ರವೇತಕೆ ತೊತ್ತು ಬಡಕನಿಗೆ ಪರತತ್ವದ ವಿಚಾರವೇಕೆ ಕರ್ತು ಕೃಷ್ಣನ ನೆನೆಯದವನ ಉತ್ತಮಗುಣವೇತಕೆ || ಮೂಲ ಮಂತ್ರವಿಲ್ಲದವಗೆ ಮೇಲೆ ದೇವತಾರ್ಚನೆಯೇಕೆ ಸಾಲಿಗ್ರಾಮಾಭಿಷೇಕವಿಲ್ಲದ ತೀರ್ಥವೇತಕೆ ಸೂಳೆಯಗಾರಗೆ ತುಳಸಿಮಾಲೆಯ ಶೃಂಗಾರವೇಕೆ ಮಾಲೋಲನ್ನ ನೆನೆಯದವನ ನಾಲಿಗೆಯೇತಕೆ || ಹಸಿವು ತೃಷೆಯ ಸಹಿಸದವಗೆ ಹುಸಿಯಾದ ವೈರಾಗ್ಯವೇಕೆ ವಿಷಯ ಮೆಚ್ಚಿದವಗೆ ಪರರ ಕುಶಲವೇತಕೆ ಪುಸಿಯಾದ ಜಪ ಮಾಡುವವಗೆ ಮುಸುಕಿನ ಡಂಭವದೇಕೆ ಪಿಸಜನಾಭನಿಗರ್ಪಿಸಿದ ಅಶನವೇತಕೆ || ಊರ್ಧ್ವಪುಂಡ್ರ ಹಚ್ಚದವನ ಮುಖವ ತಿದ್ದಿ ನೋಡುವದೇಕೆ ಶುದ್ಧ ಸಾತ್ವಿಕಗೆ ಪರರ ಬುದ್ಧಿಯೇತಕೆ ಕದ್ದು ಹೊಟ್ಟೆ ಪೊರೆಯುವವಗೆ ಶುದ್ಧ ಶೀಲ ವೃತ್ತಿಯೇಕೆ ಮಧ್ವ ಮತವ ಹೊಂದದವನ ಪದ್ಧತಿಯೇತಕೆ || ಕಂಡ ನಾರಿಗಿಚ್ಛೈಸುವ ಲಂಡಗೆ ಪುರಾಣವೇಕೆ ಬಂಡು ಮಾತಿನ ಕವಿಯ ಬಹು ಪಾಂಡಿತ್ಯವೇತಕೆ ಪುಂಡರೀಕಾಕ್ಷ ನಮ್ಮ ಶ್ರೀ ಪುರಂದರವಿಠಲನ್ನ ಕಂಡು ಕಂಡು ಭಜಿಸದವಗೆ ಉದ್ದಂಡವೇತಕೆ ||