Skip to main content

ಸ್ಮರಿಸುವ ಜನಕೆಲ್ಲ

( ರಾಗ ಸುರುಟಿ. ಆದಿ ತಾಳ)

ಸ್ಮರಿಸುವ ಜನಕೆಲ್ಲ ಭವಭಯ
ಪರಿತಾಪಗಳಿಲ್ಲ ||ಪ||
ಶರಣಾಗತಜನವತ್ಸಲನೆನಿಸಿದ
ಕರಿಗಿರಿದುರ್ಗದ ನರಹರಿ ನಿನ್ನನು ||ಅ||

ಪೂರ್ವಸುಕೃತದಿಂದ, ಸುಜನಕೆ
ತೋರ್ವೆ ನೀ ಮುದದಿಂದ
ಸಾರ್ವ ಕಾಲದೊಳು ಮಹದಾನಂದದಿ
ದುರ್ವಾಸರು ಪೂಜಿಪ ಮೂರುತಿ ನಿನ್ನ ||

ಕಾಶಿತೀರ್ಥದಿಂದ ಚಕ್ರ ಪ-
ರಾಶರತೀರ್ಥದಿಂದ
ಲೇಸಾದ ಮಾರುತಪಾದತೀರ್ಥ ನರ-
ಕೇಸರಿ ತೀರ್ಥದಿಂದೊಪ್ಪುವ ನಿನ್ನನು ||

ನೀನಿಹ ಕ್ಷೇತ್ರದೊಳು ಸೇರಿಹ
ವಾನರ ಪಕ್ಷಿಗಳು
ಮಾನವಾದಿ ಬಹುಪ್ರಾಣಿ ಸಮೂಹಕೆ
ಏನು ಪುಣ್ಯಫಲವಿರುವುದೊ ತಿಳಿಯದು ||

ಅತ್ತಿಯ ಮರದಲ್ಲಿ ಕಾಯ್ಗಳು
ಹತ್ತಿರುವಂದದಲಿ
ಮೊತ್ತಮೊತ್ತವಾದ ಬ್ರಹ್ಮಾಂಡ ನಿನ್ನೊಳು
ಹತ್ತಿಕೊಂಡಿಪ್ಪುದನಂತಕೋಟಿಯೆಂದು ||

ಅಡವಿಯ ಮೃಗಗಳಿಗೆ ಬಹುಬಗೆ
ಗಿಡಲತೆಮರಗಳಿಗೆ
ಒಡೆಯ ನೀನಲ್ಲದೆ ಅನ್ನೋದಕಗಳ
ಕೊಡುವರೆ ಮನುಜರು ನೀ ಗತಿ ಸಲಹೆಂದು ||

ಕ್ಷುದ್ರ ದೈತ್ಯರ ಗಂಡ ಕರುಣಸ-
ಮುದ್ರತಿಮಿರಚಂಡ
ರೌದ್ರದಿ ಅಸುರರ ಮರ್ದಿಸಿ ಲೋಕೋ-
ಪದ್ರವ ಬಿಡಿಸಿದ ರುದ್ರಾಂತರ್ಗತ ನಿನ್ನ ||

ಭೂತಗ್ರಹಾದಿಗಳು ಸೋಕಿದ
ಭೀತಿಜ್ವರಾದಿಗಳು
ಚೇತೋಮುಖ ನಿನ್ನ ನೋಡಲು ಇನ್ನಾ
ಪಾತಕವಳಿದು ಯಾತನೆ ಕಳೆವುದು ||

ಲಕ್ಷ್ಮೀ ಸಹಿತವಾಗಿ ಭಕ್ತರ
ರಕ್ಷಿಸುವುದಕಾಗಿ
ಲಕ್ಷಣಯುಕ್ತದಿ ಬಂದು ನಿಂದೆ ಶ್ರೀ
ಲಕ್ಷುಮಿನರಸಿಂಹ ನಿನ್ನ ಚರಿತ್ರೆಯ ||

ಕರಿಗಿರಿ ನರಸಿಂಹ ಭಕ್ತರ
ದುರಿತದಂತಿಸಿಂಹ
ಪರಿಪಾಲಿಸು ನಾ ಮೊರೆಹೊಕ್ಕೆನು ನಿನ್ನ
ಗುರುಪುರಂದರವಿಟ್ಠಲ ನಿನ್ನನು ||

ದಾಸ ಸಾಹಿತ್ಯ ಪ್ರಕಾರ: 
ಬರೆದವರು: 

Comments