ಪರಾಕು ಮಾಡದೆ

(ರಾಗ ಸಾವೇರಿ ಆದಿ ತಾಳ) ಪರಾಕು ಮಾಡದೆ ಪರಾಮರಿಸಿ ಎನ್ನ ಅಪರಾಧಂಗಳ ಕ್ಷಮಿಸೊ ||ಪ|| ಧರಾರಮಣ ಫಣಿಧರಾರ್ಚಿತ ಸುರಾಧಿಪತಿ ವಿಧಿ ಹರಾದಿವಂದಿತ ||ಅ.ಪ|| ನರರೊಳಗೆ ಪಾಮರನು ನಾನಿಹ- ಪರಕೆ ಸಾಧನವರಿಯೆ ಶ್ರೀಹರಿಯೆ ಶರಣು ಹೊಕ್ಕೆ ನಿನ್ನ ಚರಣ ಕಮಲಕ್ಕೆ ಕರುಣದಿಂ ನಿನ್ನ ಸ್ಮರಣೆ ಎನಗಿತ್ತು || ಜಪವನರಿಯೆನು ತಪವನರಿಯೆನು ಉಪವಾಸ ವ್ರತಗಳನರಿಯೆ ಶ್ರೀ ಹರಿಯೆ ಕೃಪಾವಲೋಕನದಿಂದ ಆ ಪಾಪಗಳನೆಲ್ಲ ಅಪಾಹತವ ಮಾಡೊ ಅಪಾರ ಮಹಿಮನೆ || ಕರಿಯ ರಕ್ಷಿಸಿ ದ್ರೌಪದಿಯ ಮೊರೆ ಲಾಲಿಸಿ ತರಳಗೊಲಿದು ನೀ ಪೊರೆದೆ ದಯದೆ ಸಿರಿಯರಸ ನಿನ್ನ ಸರಿಯಾರು ಕಾಣೆ ಕರುಣಿಸಯ್ಯ ಶ್ರೀ ಪುರಂದರ ವಿಟ್ಠಲ ||