ಪತಿಭಕುತಿ ಇಲ್ಲದಿಹ ಸತಿಯ ಸಂಗ

ಪತಿಭಕುತಿ ಇಲ್ಲದಿಹ ಸತಿಯ ಸಂಗ

( ರಾಗ ಕಾಂಭೋಜ. ಛಾಪು ತಾಳ) ಪತಿಭಕುತಿ ಇಲ್ಲದಿಹ ಸತಿಯ ಸಂಗ ವ್ರತಗೆಟ್ಟು ಸುಖ ಪಡೆಯಲಿಲ್ಲವೋ ರಂಗ ||ಪ|| ಗಂಡ ಬಂದರೆ ಎದ್ದು ನಿಲ್ಲದೆ ಮಂಚದ ಮೇಲೆ ಚಂದದಲಿ ಕುಳಿತು ಮಾತಾಡುತಿಹಳ ಅಂದೆಲ್ಲವನು ಮೀರಿ ಕಾಡಿ ಬೇಡುವ ಸತಿಯು ಗಂಡುತೊತ್ತಿನ ಸಂಗವಭಿಮಾನ ಭಂಗ || ಒಂದು ತಂದರೆ ಮನೆಗೆ ಹತ್ತೆಂದು ಭಾವಿಸದೆ ತಂದರೆ ಹತ್ತು ಮನೆಲೊಂದು ಮಾಡಿ ಇಂದೇನಿಲ್ಲವೊ ಎಂದು ಮುಖ ಮೂರು ಕಡೆ ತಿರುವಿ- ಕೊಂಡು ಹೋಗುವ ನಾರಿ ದೊಡ್ಡ ಬಕಮಾರಿ || ಮಕ್ಕಳಿಗೆ ಕೊಡಲಿಲ್ಲ ಮರಿಗಳಿಗೆ ಇಡಲಿಲ್ಲ ನಾಲ್ಕುವರೆ ಬಣ್ಣ ಭಂಗಾರವಿಲ್ಲ ಚಿಕ್ಕವಳು ನಿನ್ನ ಕೈಪಿಡಿದು ಕೆಟ್ಟೆನೆಂಬ ಮುಕ್ಕು ತೊತ್ತೆಯ ಸಂಗವಭಿಮಾನ ಭಂಗ || ತಾಯ ಹೊರಡಿಸು ತಂದೆ ಮೊದಲೆ ದಾಯಾದ್ಯರ ಮಾಯೆಯನು ಬಿಡು ನಿನಗೆ ಬೇಕಾದರೆ ನ್ಯಾಯದಲಿ ಬೇರೆ ಮನೆಯನು ಕಟ್ಟು ಎಂದೆಂಬ ಮಾಯಗಾತಿಯ ತೊತ್ತು ಹೆಡತಲೆಯ ಮೃತ್ಯು || ಅಣ್ಣ ತಮ್ಮಂದಿರಾ ಹೆಣ್ಣು ಒಡಹುಟ್ಟಿದರ ಇನ್ನು ಬಿಡು ನಾ ನಿನಗೆ ಬೇಕಾದರೆ ಬಿನ್ನಣೆಯ ಮಾತಾಡಿ ಕ್ಲೇಶಬಡಿಪಳ ಬಿಡಿಸಿ ಚೆನ್ನ ಶ್ರೀಪುರಂದರವಿಠಲ ದಯಮಾಡೋ ||
ದಾಸ ಸಾಹಿತ್ಯ ಪ್ರಕಾರ
ಬರೆದವರು