ಚಿತ್ತ ಶುದ್ಧಿಯಿಲ್ಲದ ಮನುಜ

( ರಾಗ ಮುಖಾರಿ. ಝಂಪೆ ತಾಳ) ಚಿತ್ತ ಶುದ್ಧಿಯಿಲ್ಲದ ಮನುಜ ಜ್ಞಾನಿಯೇ ||ಪ|| ಪಾಪ, ಹೊತ್ತು ಕಳೆಯದಂಥ ನರ ಮನುಜನೆ ||ಅ|| ಬಂಧನದೊಳಿಹ ವ್ಯಾಘ್ರ ಅದು ಬಹು ತಪಸ್ವಿಯೇ ಸಿಂಧುವಿನೊಳಿಹ ನೊರೆ ಸಿತಕರಣವೇ ಅಂಧಕನು ಕಣ್ಣು ಮುಚ್ಚಲು ಯೋಗಸಾಧನವೇ ಮಂದಮತಿ ಸುಮ್ಮನಿರಲದು ಮೌನವೆ || ಶ್ವಾನ ಬೂದಿಯೊಳಿರಲು ಶಿವಭಕ್ತನೆನಬಹುದೆ ಕಾನನದೊಳಿಹ ಕಾಗೆ ವನವಾಸಿಯೇ ಗಾಣ ತಿರುಗಲೆತ್ತು ದೇಶಯಾತ್ರೆಯೆನಬಹುದೆ ಮೀನದಾಸೆಯ ಬಕನ ಸ್ಥಿತಿ ಧ್ಯಾನವೇ || ತೋಳ ಅಡವಿಯ ತಿರುಗಲು ಅದು ದಿಗಂಬರನೆ ಗಾಳಿಯುಂಬುವ ಭುಜಗ ಉಪವಾಸಿಯೇ ಆಲದ ಮರಕೆ ಜಡೆಯಿರಲು ಅದು ತಪಸ್ವಿಯೆ ಕಾಲದಲ್ಲಿಹ ಗೂಗೆ ಹಿರಿಯಾಗಬಹುದೆ || ಮಾರಿ ಮನೆಯೊಳಗಿರಲು ಮತ್ತೆ ಸಹಕಾರಿಯೇ ಊರ ಒಳಗಿನ ಕಳ್ಳ ಅವ ನೆಂಟನೇ ಜಾರೆಯೆನಿಸುವಳು ಕುಲವನಿತೆಯೇ ಸಂ- ಸಾರ ಮಗ್ನನಾದವ ಜ್ಞಾನಿಯೇ || ಮಂಡೂಕ ಕೂಗಲದು ಮಂತ್ರವೆಂದೆನಬಹುದೆ ಗುಂಡು ನೀರೊಳಗಿರಲು ಅದು ಸ್ನಾನವೇ ಪುಂಡರೀಕಾಕ್ಷ ಸಿರಿ ಪುರಂದರವಿಠಲನ್ನ ಕಂಡು ಭಜಿಸದವ ಪಾಪಿ ಅವ ಮನುಜನೇ ||