Skip to main content

ಗೋಪಿ ನಿನ್ನ ಮಗಗಾಗಿ

( ರಾಗ ನಾದನಾಮಕ್ರಿಯಾ. ಆದಿ ತಾಳ)

ಗೋಪಿ ನಿನ್ನ ಮಗಗಾಗಿ ಕೇರಿಯ ಬಿಟ್ಟು
ಪೋಪೆವು ಬೆಳಗಾಗೆ ||ಪ||

ಮಕ್ಕಳನಾಡಗೊಡ, ಮನೆಯ
ಪೊಕ್ಕು ಉಕ್ಕುವ ಹಾಲು ಬಿಡ
ಘಕ್ಕನೆ ಕೊಂಡೋಡುವ, ಬೆನ್ನಟ್ಟಲು
ನಕ್ಕು ತಾ ಸೆರಗ ಬಿಡ ||

ಮೊಸರನೆಲ್ಲವ ಸುರಿವ, ನೆಲುವಿನ
ಹೊಸ ಬೆಣ್ಣೆಗೆ ಹಾರುವ
ಹಸುಳೆರೆಲ್ಲರಿಗೆ ಈವ, ಕೃಷ್ಣಯ್ಯ ತಾ
ಮುಸುಕಿನೊಳಗೆ ಜಾರುವ ||

ಅಂಥಿಂಥವನಲ್ಲಮ್ಮ ಈ ಮಗ
ಜಗದಂತರ್ಯಾಮಿ ಕಾಣಮ್ಮ
ಎಂತು ತಪ್ಪಿಸಿಕೊಂಡೆವು ನಾವು ಶ್ರೀ-
ಕಾಂತ ಪುರಂದರವಿಠಲನ ||

ದಾಸ ಸಾಹಿತ್ಯ ಪ್ರಕಾರ: 
ಬರೆದವರು: