Skip to main content

ಏನಾಯಿತೋ ನಿನಗೆ ಶ್ರೀಹರಿ

( ರಾಗ ಶಂಕರಾಭರಣ. ಆದಿ ತಾಳ)

ಏನಾಯಿತೋ ನಿನಗೆ ಶ್ರೀಹರಿ ಹರಿ ||ಪ||
ನಾನಿನ್ನೇನು ಮಾಡಲಿ ಕಂದ ||ಅ||

ಅಂಗಳದೊಳಗಾಡೋ ಗೋಪೀಕಂದಗೆ ಗ್ರಹ ಸೋಕಿ ಅಂಗಾರನಿಟ್ಟಳು ಗೋಪಿ ತಾ
ರಕ್ಷೆಯ ಕಟ್ಟಿದಳು ಅಂಗನೆ ಹರಿಯ ಕಂಡು ಗೋಪಿ ತಾ ಕಂಗೆಟ್ಟಳು ಆಗ ||

ಧೂಪ ಕಾಣಿಕೆಯನು ಕೊಂಡು ನೆರೆಮನೆ ಜಾಣೇರ ಜಾಣೆ ರಂಗಗೆ ಪೇಳೇ
ಆಕಾಶದ ಬೊಮ್ಮನೆ ಸೋಕಿಹುದು ಬೊಮ್ಮಗೆ ಆಹುತಿಯಕೊಟ್ಟರೆ ಗುಣವಾಗೋದು ನಿನ್ನ ಕಂದಗೆ ||

ಪೂತನಿಯ ಮೊಲೆಯನುಂಡು ಕೃಷ್ಣಯ್ಯ ತಾ ಭೀತಿಗೊಂಡನು ತಾಯೆ
ಐದು ಮೊಘೆಯ ತುಪ್ಪ ಬೇಗನೆ ಆಹುತಿಯ ಕೊಟ್ಟರೆ ಗುಣವಾಗೋದು ನಿನ್ನ ಕಂದಗೆ ||

ಐದು ಮಣ ಗೋಧಿಟ್ಟು ಐದು ಮೊಗೆಯ ತುಪ್ಪ ಪಡಿವವಳೆ ಬಡಿಸುತಿರೆ
ಕೃಷ್ಣಯ್ಯ ತಾ ಕಡೆಗಣ್ಣಿನಲಿ ನೋಡಿ ಬಡಿವಾಣ(ಹರಿವಾಣ?) ಬಳದುಂಡ ಬೊಮ್ಮ ಬಾಯಲಿ ಮಣ್ಣೆಂದ ||

ಸೃಷ್ಟಿಯೊಳಗಿಂಥಾ ಸ್ವಾಮಿ ಇಷ್ಟ ಮೂರುತಿ ಕಾಣೆ
ತೊಟ್ಟಿಲೊಳಗೆ ಮಲಗಿದ್ದ ಶ್ರೀಪುರಂದರವಿಠಲ ನಗುತಿದ್ದ ||

ದಾಸ ಸಾಹಿತ್ಯ ಪ್ರಕಾರ: 
ಬರೆದವರು: