Skip to main content

ಏಕೆ ದಯ ಬಾರದೋ

(ರಾಗ ಭೈರವಿ ಆದಿ ತಾಳ)

ಏಕೆ ದಯ ಬಾರದೋ
ಲೋಕನಾಯಕ ನಿನಗೇಕೆ ||ಪ||

ಇಂದಿರೇಶ ನಿಮ್ಮ ಪಾದ-
ದ್ವಂದ್ವವ ನಂಬಿದೆನಯ್ಯ
ಬಂದು ಸಲಹೊ ಬೇಗದಿಂದ
ನಂದಗೋಪನ ಕಂದ ನಿನಗೆ ||

ಸೃಷ್ಟಿಯೊಳಗೆ ನಿನಗೆ ಎ-
ಳ್ಳಷ್ಟು ಕರುಣ ಬಾರದೇಕೊ
ಸಿಟ್ಟೇಕೊ ಎನ್ನ ಮೇಲೆ
ಮುಷ್ಟಿಮರ್ದನ ಕೃಷ್ಣ ನಿನಗೆ ||

ಅಷ್ಟಮ ಸ್ತ್ರೀಯರ ಪತಿಯೆ ಎನ್ನ
ಕಷ್ಟವ ಪರಿಹರಿಸೊ ಮುನ್ನ
ಬೆಟ್ಟಲಿ ಬೆಟ್ಟವನೆತ್ತಿದ
ದಿಟ್ಟ ಶ್ರೀ ಗೋಪಾಲ ನಿನಗೆ ||

ವಾಸುಕಿಶಯನ ಎನ್ನ
ದೋಷವ ಪರಿಹರಿಸೊ ಇನ್ನು
ದಾಸ್ಯವಿತ್ತು ನೋಡೊ ಅಂಜನಾ-
ದ್ರೀಶ ಶ್ರೀನಿವಾಸ ನಿನಗೆ ||

ಅರವಿಂದಾಕ್ಷ ನೀನೆ ಎನಗೆ
ಸರುವ ಬಳಗ ಬಂಧು ಭಾಗ್ಯ
ಅರಿಯ ಪರಾಕ್ರಮವ ಬೇಗೆ
ಪುರಂದರವಿಠಲ ನಿನಗೆ||

ದಾಸ ಸಾಹಿತ್ಯ ಪ್ರಕಾರ: 
ಬರೆದವರು: