ಊರ ದೇವರ ಮಾಡಬೇಕಣ್ಣ

( ರಾಗ ನಾದನಾಮಕ್ರಿಯೆ ಅಟತಾಳ) ಊರ ದೇವರ ಮಾಡಬೇಕಣ್ಣ, ತನ್ನೊಳಗೆ ತಾನೆ, ಊರ ದೇವರ ಮಾಡಬೇಕಣ್ಣ ||ಪ|| ಊರ ದೇವರ ಮಾಡಿರೆಂದು ಸಾರುತಿದೆ ಶ್ರುತಿ ಸ್ಮೃತಿಗಳು ದ್ವಾರಗಳ ಒಂಭತ್ತು ಮುಚ್ಚಿ ನಿಲ್ಲಿಸಿ ಧ್ಯಾನ ಭ್ರೂಮಧ್ಯದಿ ||ಅ| ಎಷ್ಟು ಯುಗಗಳು ತೀರಿ ಹೋಯಿತಣ್ಣ, ದೇವರ ಮಾಡದೆ ಕಷ್ಟದಿಂದ ನೊಂದೆ ಕಾಣಣ್ಣ ಅಷ್ಟದಳದ ಕಂಭ ನಿಲ್ಲಿಸಿ , ನಷ್ಟ ಬರುವ ಕಾಲದಲ್ಲಿ ಕೆಟ್ಟ ದೈವಕ್ಕಾಗಿ ನೀನು , ದುಷ್ಟ ಕೋಣನ ಶಿರವ ತರಿದು || ನಾನೇ ಎಂಬೋ ಮೇಕೆ ಹೋತಣ್ಣ, ಅದಕ್ಕೆ ತಕ್ಕ ಜ್ಞಾನವೆಂಬ ಪೋತ ರಾಜಣ್ಣ ತಾನೆ ಎಂಬೋ ಭಲ್ಲೆ ಹಿಡಿದು, ಹೀನ ಹೋತಿನ ಸೀಳಿ ಬಿಸುಟು ಜ್ಞಾನ ಗುಡಿಸಲು ಸೂರೆಗೊಂಡು , ತಾನೆ ಬೆಳಗೋ ಜ್ಯೋತಿ ನಿಲ್ಲಿಸಿ || ಕರ್ತವೆಂಬೋ ಕ್ಲೇಶ ಕುರಿಯಣ್ಣ, ಅದನ್ನು ತಂದು ಕಟ್ಟಿ ತಲೆಯನೆ ಕುಟ್ಟಬೇಕಣ್ಣ ಅಷ್ಟ ವಿಧದ ಕುರಿಗಳನ್ನು , ಕಟ್ಟಿ ತಲೆಯನೆ ಚೆಂಡನಾಡಿ ಹುಟ್ಟಿ ತಿರುಗೋ ಕೋಳಿಯನ್ನು , ಕುಟ್ಟಿ ಚೂರಿ ಹಾಕುತಲಿ || ನಾಳೆ ನೋಡುವೆನೆನ್ನ ಬೇಡಣ್ಣ, ಕೇಳಣ್ಣ ನಿನ್ನ ಬಾಳುಯೆಂತೋ ನೀನೆ ನೋಡಣ್ಣ ನಾಳೆ ನಾಡದು ಎಂದು ಹೀಗೆ, ಬಾಳುವ ಕಾಲದಿ ಯಮನು ಕೋಳಿ ಪಿಳ್ಳೆಯಾಡುವಾಗ, ಹಾಳಿ ಹದ್ದಿನಂತೆ ಒಯ್ಯುವ || ಹೆಂಡಿರು ಮಕ್ಕಳು ಸುಳ್ಳಣ್ಣ, ಕೇಳಣ್ಣ ನಿನ್ನ ಮಂಡೆ ತುಂಬ ಬಳಗ ಕಾಣಣ್ಣ ತುಂಡನಾದ ಯಮನು ಬಂದು, ಮಂಡೆ ಮೇಲೆ ಹೊಯ್ಯುವಾಗ ಹೆಂಡಿರು ಮಕ್ಕಳು ನಿನ್ನ, ಕಂಡು ಕಂಡು ಬಿಡಿಸೋದಿಲ್ಲ || ಮತ್ತೆ ಹೆಣ್ಣಿನ ನೋಡುವೆಯಲ್ಲೋ, ನೀ ಕಳಿಸಿದಂಥ ಬುತ್ತಿಯನ್ನೆ ಉಂಬುವೆಯಲ್ಲೋ ಮೃತ್ಯುವಿನ ಬಾಯಿಗೆ ನೀ, ತುತ್ತು ಆಗಿಹೋಗಬೇಡ ತೊತ್ತಾಗಿ ಗುರುವಿಗೆ ನಿತ್ಯ, ಉತ್ತಮ ಸೇವೆಯನ್ನು ಮಾಡು || ಮುಂದೆ ಇಂಥ ಜನ್ಮ ಕಾಣಣ್ಣ, ಬಾರದೋ ನಿನಗೆ ಮಂದಮತಿಯು ಆಗಬೇಡಣ್ಣ ಹಿಂದಿನ ಕಷ್ಟದಗಿಂತ, ಮುಂದಿನ ಹೆಮ್ಮೆಯ ಮರೆತು ತಂದೆ ಪುರಂದರವಿಠಲನ್ನ, ಹೊಂದಿ ನೀನು ಮುಕ್ತನಾಗೊ ||