ಇದಿರ್ಯಾರೊ ಗುರುವೆ

( ರಾಗ ಆನಂದಭೈರವಿ ಏಕತಾಳ) ಇದಿರ್ಯಾರೊ ಗುರುವೆ ಸಮರ್ಯಾರೊ ||ಪ|| ಮದನಜನಕ ಪ್ರಿಯ ಮಧ್ವರಾಯ ||ಅ|| ಸನ್ನುತಮಹಿಮ ಪ್ರಸನ್ನವದನ ನಿನ- ಗನ್ಯನಲ್ಲವೋ ನೀ ಎನ್ನ ರಕ್ಷಿಸಬೇಕೋ ನಿನ್ನ ನೋಡಿದವರು ಧನ್ಯರಾಗುವರು ನಿನ್ನ ದಯಾಮೂರ್ತಿ ಮನ್ನಿಸಿನೋಡೊ || ದುರ್ಜನರ ಗರ್ಜನದಿಂದ ಓಡಿಸಿ ಸಜ್ಜನರನು ಸಂರಕ್ಷಿಸಿದಾತನೆ ತ್ರಿಜಗದಲ್ಲಿ ಮಧ್ಯಗೇಹರ ಪತ್ನಿಯ ಪೂಜ್ಯ ಜಠರದಲಿ ಜನಿಸಿದ ಧೀರ || ವೇದಶಾಸ್ತ್ರಗಳಿಂದ ಮಾಯ್ಗಳ ಖಂಡಿಸಿ ಸಾಧಿಸಿ ಹರಿಯೆ ಸರ್ವೋತ್ತಮನೆಂತೆಂದು ಮೋದಭರಿತವದ ದಿವ್ಯಶಾಸ್ತ್ರವ ಮಾಡ್ದ ಮೋದತೀರ್ಥ ಪುರಂದರವಿಠಲದಾಸ ||